ភាពជាអ្នកដឹកនាំ ចំពោះនាងខ្ញុំ គឺជាការជះឥទ្ធិពលទៅលើមនុស្ស ឲ្យពួកគាត់ ចេះប្រើប្រាស់សក្ដានុពលដ៏ប្រសើរបំផុតដែលខ្លួនមាន ធ្វើឲ្យជីវិតរបស់ខ្លួនបានប្រសើរឡើង តាមរយៈការគិតធំ ផ្ដើមធ្វើពីតូច "នេះគឺជាសម្ដីរបស់កញ្ញា នាង សុវត្ថានា ប្រធាន "សមាគមគំនិតផ្ដួចផ្ដើមនៃការផ្លាស់ប្ដូរ" នៅក្នុងបទសម្ភាសន៍មួយ ជាមួយអង្គការវិទ្យាស្ថានបើកទូលាយ ។ កញ្ញា ត្រូវបានមជ្ឈដ្ឋានជុំវិញ ទទួលស្គាល់ថា ជានារីឆ្នើមមួយរូប ដោយសារ ទេពកោសល្យដឹកនាំដ៏ប៉ិនប្រសប់របស់កញ្ញា ដែលមាន ទស្សនវិស័យ "គិតធំ ផ្ដើមធ្វើពីតូច" អនុញ្ញាតឲ្យកញ្ញាត្រូវបានជ្រើសតាំងជាប្រធានសមាគម ចូលប្រឡូកក្នុងពិភពការងារតាំងពីវ័យក្មេង ។
សុវត្ថានា បានដំណាលប្រាប់ អំពីដំណើរជីវិតការងាររបស់ ខ្លួន ដូច្នេះថា ៖ "...នាងខ្ញុំ ផ្ដើមធ្វើការងារពេញម៉ោង នៅឯសមាគមយុវជនខ្មែរ "ក្នុងឆ្នាំ២០០៤ ។ តាំងពីឆ្នាំ២០០៧មក នាងខ្ញុំ បាននិងកំពុងធ្វើការ ជាអ្នកជំនួយការកម្មវិធី "មូលនិធិ ហ្វ្រេឌិច ណៅមែន" ។ ក្នុងពេលជាមួយគ្នានេះ ដែរ នាងខ្ញុំ ក៏ជាប្រធានស្ម័គ្រចិត្តនៃ "សមាគមគំនិតផ្ដួចផ្ដើម នៃការផ្លាស់ប្ដូរ" ដែលជាអង្គការយុវជនស្ម័គ្រចិត្ត ស្ថិតនៅរាជធានីភ្នំពេញ និងមានការិយាល័យសាខាមួយ នៅខេត្តបាត់ដំបង ។ តាំងពីអាយុ១៥ឆ្នាំមក នាងខ្ញុំ បានចូលប្រឡូកក្នុងសកម្មភាពស្ម័គ្រចិត្តជាច្រើន មានជាអាទិ៍ ការបោះជំរំយុវជន សិក្ខាសាលា កិច្ចប្រជុំ ការបង្រៀនភាសាអង់គ្លេសនិងកុំព្យូទ័រ ជំនួយការគម្រោងអភិវឌ្ឍន៍នានា និងការបង្កើតគម្រោងជាច្រើនទៀតសម្រាប់យុវជន"។
ឈរលើទស្សនវិស័យច្បាស់លាស់របស់ខ្លួន កញ្ញា នាង សុវត្ថានា បានបង្ហាញពីបែបផែននៃទេពកោសល្យដឹកនាំរបស់ខ្លួនថា កញ្ញាប្រើប្រាស់ភាពជាអ្នកដឹកនាំរបស់កញ្ញា ដើម្បីជះឥទ្ធិពលដល់មនុស្ស ដោយការផ្ដល់ឲ្យអ្នកទាំងនោះ នូវគំរូវីរភាពណាមួយដែលបុគ្គលនោះពេញចិត្ត ហើយនិងលើកទឹកចិត្តឲ្យអ្នកទាំងនោះ ជឿជាក់លើសក្ដានុពលដ៏ប្រសើរបំផុតដែលខ្លួនមាន ។ កញ្ញាបានបន្ថែមទៀតថា ជាដំបូង កញ្ញាផ្សារភ្ជាប់ទំនាក់ទំនងផ្ទាល់ខ្លួន ជាមួយអ្នកទាំងនោះ តាមរយៈការចែករំលែករឿងរ៉ាវផ្ទាល់ខ្លួន និងការជួយពួកគេដោះស្រាយបញ្ហាផ្ទាល់ខ្លួន។ កញ្ញាបានប្រកាន់យក នូវជំពូកអ្នកដឹកនាំមួយបែប ដែលកញ្ញាបានឲ្យដឹង ដូច្នេះថា ៖ "នាងខ្ញុំ ចង់ធ្វើជាអ្នកដឹកនាំមួយប្រភេទ ដែលគិតអំពីការបម្រើអ្នកនៅក្រោមបង្គាប់ ជាជាងការពង្រឹងការបង្គាប់បញ្ជារបស់ខ្ញុំទៅលើពួកគេ"។
ជាសមិទ្ធផល សុវត្ថានា បានប្រាប់ថា៖ "ឥទ្ធិពលទី១នៃការដឹកនាំរបស់នាងខ្ញុំ ដែលនាងខ្ញុំសង្កេតឃើញ គឺបន្លាស់ប្ដូរវិជ្ជមានជាច្រើន របស់យុវជនដែលនៅជុំវិញខ្លួន ។ ពួកគេ បានប្រែក្លាយ ការគ្រាន់តែចេះគិតគូរថែទាំអំពីខ្លួនឯង ឲ្យទៅជាការចេះយកចិត្តទុកដាក់ថែទាំសង្គមទាំងមូល ហើយបានចាប់ផ្ដើមស្វែងរកវិធីសាស្ត្រ ជួយធ្វើឲ្យប្រទេសកាន់តែប្រសើរឡើង ។ នាងខ្ញុំបានឃើញផ្ទាល់នឹងភ្នែកថា ប្រមាណ ១០នាក់ នៃយុវជនទាំងនោះ បានផ្ដើមគំនិតបង្កើតគម្រោងជាច្រើន ទាក់ទងនឹងការស្ម័គ្រចិត្តនានា ក្រោមកិច្ចសម្របសម្រួលពីសមាគម ។ ...ឥទ្ធិពលទី២នោះ គឺថា ភាពជាអ្នកដឹកនាំរបស់នាងខ្ញុំ ត្រូវបានប្រើប្រាស់ជាគំរូវីរភាព សម្រាប់យុវជនដទៃទៀត ដែលជំរុញឲ្យពួកគេធ្វើសកម្មភាពនិងជឿជាក់លើខ្លួនឯង"។
ក្រៅពីជោគជ័យ ដែលរៀបរាប់ទាំងអំបាលម៉ានខាងលើ សុវត្ថានា ក៏ជួបប្រទះនូវការប្រឈមមួយចំនួនដែរ ទាក់ទងនឹងការគ្រប់គ្រងពេលវេលា ។ ទោះបីជាខិតខំបែងចែកការងារទៅតាមអាទិភាពរបស់វាយ៉ាងណា ក្ដី កញ្ញាមានអារម្មណ៍ថា ខ្លួនពុំទាន់ចេះគ្រប់គ្រងពេលវេលាបានល្អ ពិសេសពេលធ្វើការងារច្រើនកន្លែង សិក្សា និងថែទាំប្អូនៗរបស់កញ្ញា ក្នុងពេលតែមួយជាមួយគ្នា ។ ថ្វីបើយេនឌ័រត្រូវបានកញ្ញាធ្លាប់គិតអាចជាឧបសគ្គដល់ភាពជាអ្នកដឹកនាំ កញ្ញាបានផ្លាស់ប្ដូរការគិតនេះ ក្រោយពីកញ្ញាបានចូលប្រឡូកការងារ ក្នុងស្ថាប័នអង្គការក្រៅរដ្ឋាភិបាល ហើយអះអាងថា ស្ត្រីត្រូវបានគេផ្ដល់អាទិភាពជាច្រើន។
កញ្ញា នាង សុវត្ថានា បានផ្ដល់ជាមតិយោបល់ថា ៖ "គ្មានអ្វីដែលអាចជួយស្ត្រីឡើយ ប្រសិនបើស្ត្រីមិនទទួលស្គាល់នូវគុណតម្លៃនិងសក្ដានុពលរបស់ខ្លួននោះ ។...ស្ត្រីត្រូវយល់ថា ការកើតមកជាស្ត្រី មិនមែនជាបន្ទុកទេ តែជាអត្ថប្រយោជន៍"៕
